رواية خادمة الصقر جميع الفصول بقلم يوستينا سامي

ياسمين / لو مش هتعبك يبقي ياريت لان هنا التكسيات قليلة اوي.. وانا مشواري بعيد شوية 

كريم ابتسم / بس بشرط متعيطيش تاني علي الولد ده.. ومتكلميش صاحبتك اللي عمالة تسخنك دي 

ياسمين ضحكت /.. خلاص اتفاقناا

و فعلا كريم اخد ياسمين  ومشي بس  ياسمين كانت  مصدومة من جرائته وخفة دمه.. 

تفتكروا ياسمين دي عبيطة ؟ ولا وراها حاجة ؟ 

___________________________________

في القسم عند عساف 

عساف بحده / ايه الصوت اللي برا ده.

والده / انا جيت مخصوص علشان اتكلم معاك ونتفاهم هنا بالذوق والادب 

عساف  بتوتر / بالذوق والادب الاثنين هنا في مكتبي طيب،  روح يا عسكري يجيب كوبايتين ليمون وما تتاخرش 

خرج العسكري وعساف بص لابوه بقلق 

عساف / يا نعم... جاي مكتبي هنا ليه بعد ما طردتني امبارح من البيت.

والده / انا مش جاي اتكلم معاك في موضوع جوازك

عساف براحة/  طب الحمد لله كده احنا وصلنا لنقطه كويس يا حاج 

والده / لان انا اصلا مقرر ان فرحك بعد شهر دي حاجه مفروغ منها.... انا جاي اسالك عن الفلوس اللي كانت في الخزنه بتاعتي راحت فين

عساف بتوتر /  اه الفلوس اللي في الخزنه فهمتك

هو انت مش قلتلي برضو وقت ما تعوز اي حاجه خذ من الخزنه وانا عملت كده اخذت من عندك 

....والده حد.ف عليه التليفون اللي كان علي المكتب 

و عساف نزل تحت المكتب بخوف 

والده/  تقوم واخذ ٣٠٠ الف جنيه من الخزنه يا كل.ب ده انا كنت مطلعهم من البنك عشان فرحك وتجهيزات 

عساف خرج من تحت المكتب بحذر 

وقاله / شفت انا  قلبي كان حاسس على فكره بقى انت  اب ماحدش يثق فيه ابدا،  وبعدين ده انا اخذتهم سلف عشان صقر كان محتاجهم 

والده / نعم.. بقى عايز تفهمني ان صقر الحديدي اخذ منك انت 300  الف جنيه سلف 

عساف / ما هو صقر كده بيبان غني وسط الناس كلها لكن معنا احنا فقير يا عيني عليه، طب ده حتي لسه مدفعش قسط الحضانة بتاع معاذ 

والده / لا والله، تصدق صعب عليا اوي.. طيب يا عساف انا بقى هاكلم صقر الحديدي واعرف منه اذا كنت كذاب ولا مش كذاب وما ترجعش البيت النهارده

و خرج والده من المكتب وهو متعصب اوي وعساف متغاظ / طب ما انا اكيد مكنتش هرجع يعني

اما اب غريب فعلاا 

العسكري / الليمون يا فندم.

عساف/ رجعهم يا ابني وهاتلي مكانهم القهوه وياريت تكون ساده 

___________________________________

قدام بيت ياسمين..

كريم / اهوو اديني وصلتك قدام بيتك اعتقد ان انا كده عملت اللي عليا وزياده  كمان، عدي بقي الجمايل يا استاذة ياسمين 

ياسمين/ يا سلام طب ما انت اخرتني برده.. علشان تعرف قد ايه انا مضحية 

كريم بضحك / ياه ده انت فعلا  شخصية عظيمة وعملتي فيا خدمة كبيره جدا. طب ايه ناوي تطلعي بيتك ولا هتفضلي قاعده معايا في عربيه كدة 

ياسمين / لا طبعا هطلع.. كريم انا بجد متشكره قوي مش بس عشان ما وصلتني لا عشان انا فعلا كنت متضايقه كده وخليتني افك واضحك من قلبي 

كريم /  يا ستي ما تشكرنيش  احنا بقينا صحاب وبعدين اول ما تبقي زعلانه او في واحد يخد.عك ثاني  هتلاقيه موجود.. انا في الخدمة