كنت متضايق جدا ان حماتي هتسيب بيتها
تمام جدا، يعني مراتي ميتة، وحماتي ميتة، وهما الاتنين ساكن جسمهم شيطان، دا انا طلعت عايش في فيلم رعب وانا مش حاسس..
كريلس قالي أنت لازم تسيب البيت ده وتهرب فورا، سافر، روح اي حتة، انت مش قد اللي انت داخل عليه..
= ولما اهرب يعني يا عم كريلس، هاروح منهم فين، هيقدروا يجيبوني من أي مكان هروحه
= حل ايه يا عم كريلس اتكلم انا في عرضك
- انت تدخل معاهم الحرب
= نعم ؟
- أيوه، اسمع مني مقدامكش اختيارات تانية، انت لازم تحاربهم، وتكسبهم كمان
- بص، الجمعيات اللي بتمارس طقوس عبادة الشيطان وتحضير الأرواح والكلام دا موجودة من زمان اوي، صحيح هما ما اتشهروش غير قريب بس دا عشان الانترنت والصحافة، لكن هما كانوا موجودين من قبل كدا بقرون وليهم تاريخ طويل اسألني أنا عنه، فيه راجل شيخ من عندكم اسمه الشيخ أبو المنصور الفاتح، تسمع عنه
= لا، انا لا اعرف ابو منصور الفاتح ولا أبو منصور الغامق، بيعمل ايه دا
= ايه شغل الجلا جلا دا يا كريلس، انت أمريكا علمتك العبط وللا ايه
- يعني انت بعد كل اللي حصلك دا لسه مآمنتش ان دا علم
- الحل زي ما قولتلك عند ابو المنصور
= طب يالا بينا نروحله
- هو مين دا اللي نروحله
= ابو منصور دا
- تروحله فين دا ميت من 600 سنة
= الله يحرقك يا اخي، ولما هو ميت بتقولي ليه ان الحل عنده..
- ما احنا هنحضر روحه
= نعم يا اخويا ؟
- اسمع الكلام قولتلك، دي حرب أرواح، وأبو المنصور دا روحه قوية جدا، ولوسيفر مبيخافش من حد قده، انا حضرت جلسات كتير في امريكا كانوا بيحضروا فيها روحه عشان يفكوا السحر الأسود والمس السفلي، مفيش حل غير أن ابو المنصور يحضر في بيتك..
= طب دي هعملها ازاي، هحضر روحه ازاي في البيت وسط الشياطين اللي فيه
- انا هقولك، بس اسمع الكلام دا وركز فيه كويس اوي، وتنفذه أول ما تروح..
وسمعت اللي كريلس قالهولي، وروحت البيت..
اول ما دخلت البيت قلبي اتقبض، البيت اتحول لمتحف من متاحف الشيطان، إضاءة نيون حمرا، وشمع اسود في كل مكان في الشقة، وكفوف دم مرسومة على الحيطان، بأحجام مختلفة، كفوف أطفال وكفوف كبار..
وجماجم متعلقة في السقف..
ومراتي قابلتني لأول مرة بوشها الحقيقي، كان شكلها كريه جدا وانيابها بارزة وعينيها حمرا..
